Արևիկ Բալայան

Բարեկամներ, մենք կրկին կանգնած ենք շատ բարդ փորձության առաջ։ Երբեմն թվում է՝ այլևս չգիտենք ինչպես դիմել ձեզ, ինչ բառեր ընտրել օգնություն խնդրելիս, քանի որ մեր յուրաքանչյուր խնդրանքի հետևում կանգնած է մարդու ճակատագիրն ու իրական ցավը։

Այս պահին շարունակվում է Արևիկ Բալայանի համար կազմակերպված դրամահավաքը։ Արևիկն Արցախից է, մասնագիտությամբ՝ ուսուցչուհի, չորս երեխաների մայր։ Դրամահավաքը, սակայն, կանգ է առել… Վերջին օրերին այլևս նվիրատվություններ չեն եղել, իսկ Արևիկի պատմությունը շատ բարդ է։

Նրա երկու որդիները զինծառայողներ են։ Նրանցից մեկը պարգևատրված է Մարտական խաչով։ Այս երիտասարդները կանգնել են մեր սահմանների պաշտպանության համար և մինչև այսօր շարունակում են իրենց ծառայությունը, իսկ Արևիկը քաղցկեղ ունի։ Նա անցել է չափազանց ծանր բուժում, այդ թվում՝ ոսկրածուծի փոխպատվաստում։ Ընտանիքը արեց հնարավոր ամեն ինչ՝ վաճառեցին ունեցածը, վարկեր վերցրին, բայց այժմ կանգ առնելը կնշանակի կորցնել արդեն իսկ ձեռք բերված արդյունքները, իսկ արդյունքները կան։ Սա ամենակարևորն է։ Ահա թե ինչու այս դրամահավաքը կենսական անհրաժեշտություն է։

Հիմնադրամի գրասենյակ էր եկել նրա որդիներից մեկը։ Հիմնադրամի ղեկավար Տատյանա Օհանեսյանը պատմում է.
«Նրան ասացի, որ չեմ էլ պատկերացնում՝ ինչպես պիտի հավաքենք այդ գումարը։ Դա փոքր երեխա չէ, որի բուժման համար մարդիկ շատ ավելի հեշտ պատրաստ են աջակցել։ Այստեղ բոլորն ուզում են օգնել երեխաներին, իսկ տվյալ դեպքում խոսքը մեծ կնոջ մասին է»։

Մեզ դեռ պետք է հավաքել 5 միլիոն դրամ։ Խնդրում ենք մի՛ մնացեք անտարբեր։ Աջակցե’ք, պատմե’ք ձեր ընկերներին այս դրամահավաքի մասին, տարածե’ք այս գրառումը։ Ամեն բառը, ամեն նվիրատվությունը մեր երախտագիտությունն է այն մոր նկատմամբ, որը մեծացրել է որդիներ, որոնք իրենց ամբողջ կյանքը նվիրել են Հայրենիքին ծառայելուն։